ထိုသို့ကြည့်ရှုစစ်ဆေးစဉ် ဒုတိယဝန်ကြီးက ကျောင်းသား ကျောင်းသူများအနေဖြင့် ခေတ်မီစိုက်ပျိုးရေး၊ မွေးမြူရေးပညာရပ်များကို စားရေရိက္ခာဖူလုံရေး ထုတ်လုပ်မှုဘာသာရပ်အဖြစ် နားလည်သဘောပေါက်ရန်လိုကြောင်း၊ သက်ဆိုင်ရာ ဆရာ ဆရာမများအနေဖြင့် အလေးထားကြိုးပမ်းပေးကြရန်နှင့် လက်တွေ့ဘဝကိုအခြေခံသည့် သင်ကြားသင်ယူမှု ဆောင်ရွက်နိုင်ရေး တိုက်တွန်းပါကြောင်း ပြောကြားသည်။
ထို့နောက် ဒုတိယဝန်ကြီးနှင့်တာဝန်ရှိသူများသည် စာသင်ခန်းများအတွင်း ဆောင်ရွက်လျက်ရှိသည့် သင်ကြားသင်ယူခြင်းလုပ်ငန်းများကို ကြည့်ရှုစစ်ဆေးပြီး ကျောင်းသား ကျောင်းသူများနှင့်တွေ့ဆုံကာ စိုက်ပျိုးရေး၊ မွေးမြူရေးဘာသာရပ်များကို လေ့လာအားထုတ်မှု ပြင်းပြသောဆန္ဒများပေါ်ပေါက်လာစေရေး ဟောပြောပို့ချခြင်းနှင့် လက်တွေ့စိုက်ကွင်းများကို ကြည့်ရှုအားပေးကာ လိုအပ်ချက်များ ညှိနှိုင်းပေါင်းစပ်ဆောင်ရွက်ပေးသည်။
အလားတူ ဒုတိယဝန်ကြီးနှင့် တာဝန်ရှိသူများသည် ပျဉ်းမနားမြို့နယ် အမှတ်(၁) အခြေခံပညာအထက်တန်းကျောင်းတွင် ဆောင်ရွက်လျက်ရှိသည့် စိုက်ပျိုးရေးနှင့်မွေးမြူရေးအထက်တန်းပညာ စာတွေ့သင်ကြားပို့ချပေးနေမှုနှင့် လက်တွေ့စိုက်ကွင်းများကို ကြည့်ရှုအားပေးကြသည်။
အခြေခံပညာအထက်တန်းကျောင်းများတွင် တွဲဖက်ဖွင့်လှစ်ထားသည့် စိုက်ပျိုးရေးနှင့်မွေးမြူရေးအထက်တန်းပညာအတွက် စာသင်နှစ်တစ်နှစ်လျှင် ကျောင်းတစ်ကျောင်း၌ စိုက်ပျိုးရေး ကျောင်းသား ကျောင်းသူ ၃၀ နှင့် မွေးမြူရေး ကျောင်းသား ကျောင်းသူ ၃၀ စုစုပေါင်း ၆၀ ကို သတ်မှတ်ချက်များနှင့်အညီ ခေါ်ယူသင်ကြားပေးလျက်ရှိပြီး လက်တွေ့လုပ်ငန်းများ ဆောင်ရွက်နိုင်ရန်အတွက် ကျန်းမာရေးကောင်းမွန်သူ အခြေခံပညာအထက်တန်း KG+9 အောင်မြင်ပြီး လျှောက်လွှာပိတ်ချိန်တွင် အသက် ၂၀ နှစ်ထက် မကြီးသူများ တက်ရောက်သင်ယူနိုင်ကြမည်ဖြစ်သည်၊၊ သင်တန်းကာလသုံးနှစ်ပြီးမြောက်၍ အောင်မြင်ပါက အခြေခံပညာအထက်တန်း(စိုက်ပျိုးရေး)၊ အခြေခံပညာအထက်တန်း(မွေးမြူရေး)ပြီးမြောက်ကြောင်း အောင်လက်မှတ်ပေးအပ်ချီးမြှင့်မည်ဖြစ်ကာ လုပ်ငန်းခွင်သို့ဝင်ရောက်လိုက ဝင်ရောက်နိုင်ပြီး ဆက်လက်၍ အဆင့်မြင့်စိုက်ပျိုးမွေးမြူရေးပညာရပ်များကို သင်ယူလိုက သင်ယူနိုင်မည်ဖြစ်ကြောင်း သိရသည်။
